Marpesta Paskah di Huta

On dope au boi marpesta paskah di huta rap dohot inong dung tammat SMA, nungga hirahira 12 taon nasalpu. Biasana di tingki natal do au dohot angka haha anggi mulak alana sekalian boi rap martaon baru. Jarang do memang mulak pangaranto di ari paskah, ndang piga halak i, kecuali angka na di luat pangarantoan na jonokjonok tu huta, songon di Medan.

Godang do perubahan na huida jala huhilala di parpestaan paskah sahali i. hugoari majo da sadasada. Parjolo, parmingguon di manogot hot do dipatupa, jumolo ma parmingguon singkola minggu, dungi parmingguon naposo bulung, baru pe muse parminggon ni angka namagodang manang namatua. Paduahon, dung sidung angka parmingguon i, di pungkul 2 arian adong ma muse parminggon, digoari mai ‘jalan salib’. On dope huihuthon acara i, alai ninna inong nunga papiga halihon parmingguon ‘jalan salib’ i.

Patoluhon, dung sidung parmingguon manogot, hirahira pungkul 12 tu pungkul 1 arian, manjonohi parmingguon arian, ima ‘jalan salib’ i, adong do dipatupa fragmen tarsingot tu hamamate ni Tuhan Jesus. Angka singkola minggu dohot remaja ma napatupahon fragmen i. Uli situtu do poang! Suman hian tu karakter dohot pahean nasida, alai memang ndang marsuara, ndang adong dialog, holan lakon dohot gerakan do. Gabe hera na adong do nian na hurang, alai nungga sungkup mantap bei!

Mangihut ma muse tu fragmen i, dimulai ma parmingguon ‘jalan salib’. Mansai uli situtu do parmingguon arian i, hira na mansaritahon songon dia ma panobuson ni Jesus di hau pinorsilang alani pangalaho ni jolma manisia i. Uluan ni huria manjahahon sarita panobusan huhut ma diholangholangi ende na mambaen maliklik ateate. Maliklik alani jorbut ni pangalahonta jolma on alai alani holong tong do ditobus Jesus i. Gabe dosa Jesus i alani dosanta.

Di pungkul 3 pas, di parmingguon i dope, mangkuling ma giringgiring, jala ndang saotik sian angka parminggu i na tumatangis. Marmansam angka alasan ni angka ilu di tingki i, sadeba ma ra i namanolsoli angka pangalo nasida naso suman, sadeba ma ra i ala mangingot hamamate ni nahinaholongan ni roha nasida be. Manang aha pe alasan ni tangis i, sandok tung mariluilu do godangan angka parminggu i.

Mulak ma au dohot inong tu huta dung sidung acara parmingguon sadari manipat i. godang ma nian siingotan. Godang do hami marsarita tong dohot inong di holangholang ni parminggun manogot dohot arian. Sarita nami ditorushon ma muse dung sahat di huta. Huhut marsarita, huhut muse ma hami mangalompa manuk gota, hehe…Ndang godang memang dilompa hami, Alana holan hami padua do di jabu, jala tondong pe torop so piga do, holan parhuta do naro, ipe holan marsijalangan jalan markombur satongkin.

‘Ndang taretong au basabasa ni Tuhan tu au daba’ ninna inong di tingki maridi hami. Senyum ma au mangalusi alana nunga huboto dompak ni sarita ni inong i. Sai jotjot do dipajojor inong angka denggan basa ni Tuhan di keluarga nami molo tingki marsaritasarita hami. Godang angka halongangan memang ulaon di Tuhan di hami. PangiringiringNa, pasupasuNa, jalan habasaronNa tung so tarpajojor do. Ibanna daba sai ditonahon inonghu do tu hami ‘Jesus bahen hamu dongan muna. Burjuburju hamu. Aha naung dijanjihon ni Tuhan i di ngolu muna, pasautonNa doi sahat tu ujungna, jadi ndang pola mabiar hamu.’ Hata-hata on ma muse na hubege sian inong di parningotan ni ari Hamamate dohot ari Paskah sahali i.

Memang Godang do na boi mangaluahon rohanta sian Jesus i, ima angka parsatongkinan i, manang boi do i muse haporsuhon di portibion. Alai hamamate dohot haheheon ni Jesus i mangingothon hita di balga ni holong i, burju ni Jesus i, jala uli ni panobusonNa i.

Di sogot ni ari, rap dohot angka parhuta manang godangan halak na laho tu kuburan. Laho ma au dohot inong marbabo kuburan ni ompung. Nangpe nungga disimin kuburani, sai godang do tong tubu angka duhutduhut. Nidok ni roha nian dohot do tu kuburan i bapa nahinan molo di huta, alai nang mungkin, gabe halak abang ma nalaho tusi. Nian ndang ingkon laho tu kuburan, holan parningotan do i di hamamate dohot dikubur ni Jesus di hatiha i. Toho do Jesus mate, ditanom, alai hehe ma muse Ibana di ari patoluhon.

Sidung dua ari dua borngin di huta, tibu di manongot ni ari sogot nai, borhat ma au mulak tu pangarantoan. Marpaskah di dalan nama au, ndang sanga be marminggu dohot inong. Alai godang do huboan mulak di hatiha i. Mulak ma au dohot las ni roha!

Marpesta Paskah di Huta

2 thoughts on “Marpesta Paskah di Huta

  1. Tonggo R. Panjaitan says:

    Nice true story kak.

    Toho pandok ni namboru i, ingkon Jesus i do bahenonta donganta.
    Ndada boi tarpatupa hita manang aha, dapotsa nauli, molo so dipasu-pasu natorasta jala molo so diundukkon Debata.

    GBU ka enta nauli lagu jala naburju🙂

    1. entasimanjuntak says:

      mauliate nggo nungga ro ho tu jabu na gelleng hon..hehe…
      ima da nggo gogo ni tangiang ni natuatuanta i…hurasa isi ditangianghon natuatua angka gelleng na pintor diundukkon Debata do i ate, hehe…

      haha…mauliate anggia…unang dok au naburju bo, holan Debata do na burju bah..alai molo na uli lagu, mungkin ma…hahaha…..

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s