Martina (Marlasniroha tingki natal)

Godang halak mandok ia martina hata pendek ni “marhallet tingki natal”. Alai molo di au martina ima “marlasniroha tingki natal”. Beha, husungkun majo hamu, las do roha muna mandapothon ari natal? Molo ido, antong sahata ma hita sahali on mandok martina marlasniroha tingki natal.

Porsea manang ndang (laguboti petaho!), mandapothon natal sai tu huta do rohangku, butul! Pintor hurimang-rimangi do suara ni locceng gareja na pinalu ni panjaga gareja di ari natal dohot taon baru. Pintor habegean do i sian sude luat ni Balige. Molo natal dohot taon baru, ganjang do palu-palu ni locceng i. Nian tiap minggu sai dipalu doi, alai manang alani aha, molo natal dohot taon baru, sun do tabo ni suara ni locceng i begeon. Satuju do hamu? Ibanna molo natal, tamba do las ni roha huhilala.

Natal dohot taon baru on di huta do au. Rencana tolu ma hami, au, oma, dohot anggingku. Angka haha dohot ibotongku di Jakarta do, ai ndang godang cuti ni halak i ninna jadi ndang boi mulak tu huta. Las hian rohangku. Nunga boi huanggo kota Balige i nuaeng dohot tao toba i. Pajumpang ma ra annon iba dohot angka dongan pangaranto inna rohangku. Pintor gok ma pasti gareja di ari natal dohot taon baru binaen ni angka pangaranto. Perayaan natal ma ra di sude luat di Balige. Nga boi hubayangkon i, tiap ari pasti adong 2 manang 3 natal di balige, natal marga, natal singkola, natal luat, natal kecamatan, tu natal oikumene di tano lapang. Mansai rame ma nian. Ido daba tabo dohot asing ni natal di Balige. Molo di huta na asing ra dang pala songon i ramena.

Hubayangkon, marjoget ma angka dakdanak singkola minggu, nisumbang mai dohot hepeng arga saribu (masa dope tahe arga saribu laho manumbang?), ndang kala angka na magodang mambahen vocal group manang ende solo, ia angka natua-tua biasana marliturgi…sude ma tahe tarlibat di natal i. Jala biasana habis-habisan do di perayaan natal i, ingkon mangan do, ndang pola masa senek, pintor si 4 hurup i dibinda. Tabo ma tahe. Di natal do muse tahilala hasadaon. Angka namarmusu manang naso masipangkulingan pintor masisisean do di tingki natal. Sering do muse sesa angka utang (anggo on ndang huboto tangkas bah!). Bagak ma nian angka pahean di tingki natal i. Ingkon marbaju na imbaru do iba. Pinangke ma i pas di ari natal dohot taon baru. Songon naso tabo do nihilala molo ndang sepesial baju niba, ai sude jolma uli-uli paheanna. Jala, pintor godang hian do koor, mulai sian koor singkola minggu, naposo bulung, tu angka natua-tua. Rumbe-rumbe pe dipasang do di gareja asing ni gaba-gaba. Marganti-ganti do angka loloan marpoto di jonok di gaba-gaba i, sipata sappe marsigulut.

Alai molo nirimang-rimangi, holan ribur ni perayaan i do lapatan ni natal di hita? Nian daong ate. Molo jinaha angka thema dohot sub-thema ni angka perayaan natal, suman-suman do sude, jala hira-hira sarupa do muse; hadameon, hasadaan, las ni roha, benget ni roha, hamauliateon di haroroni Anak ni Jahowa tu portibi on, dohot angka na asing. Ndang holan tinggal di perayaan i noni, alai nian suan ma di bagasan roha. Asa molo sidung angka perayaan ni, roha naung suan angka na denggan ni boi tu lam dengganna.

Jai angka dongan, unang ma nian hita holan mamingkiri angka pahean, rumbe-rumbe ni gareja dohot dekorasi di jabunta be, manang sipanganon di perayaan natal, dohot angka na asing. Ai Jesus per ro tu portibion ndang dohot hariburon, alai dohot benget no roha do. Nian tubu situtu ma Jesus di bagasan rohanta be…Amen. Selamat ari natal ma di hita saluhutna. Butima!

Martina (Marlasniroha tingki natal)

2 thoughts on “Martina (Marlasniroha tingki natal)

  1. stenly purba says:

    “Di natal do muse tahilala hasadaon. Angka namarmusu manang naso masipangkulingan pintor masisisean do di tingki natal.”

    bah biar rohangku mulak muse do pangalaho ni halakki dung sae ari pesta i🙂

    1. entasimanjuntak says:

      hahaha…ba tinangianghon sten asa unang mulak…mura no halak batak mardongan, alai mura do tutu marmusu muse…alai molo tangkas do Jesus tubu, sai na tu dengganna do pangalaho sten…jai, rup ma hita manangianghon angka jolma na marmusu asa mardongan muse ndang holan di ari natal. beha satuju do ho sten?:)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s